KAN CHHIATTAWH THU

      Kum 1984 August thla a rawn inher chhuaka a ni tak ka chiang ta lo, ni 12 niin ka hria (ka pa hi MST Bus driver a ni) zing nichhuah hmain ka nu ho chuan kan insiam a ka pa Silsuk lama a zin dawn tum anih vangin ka nu chhungte tlawh turin zin ve turin, tuna synod bookroom kawtah hian ka nu ho in ka naute pahnih nen bus chu kan lo chang a, dar 7 velah chuan bus chu a lo thleng ta a, Bus tawi chi a nih vang nge Bus chu a tawt hle mai a aseat a lenglo pawh a kalkawng ah chuan an thu khat vek a, ka nu chu conductorin a thutna a ken avangin kan teber nau hnute hne lai nen chuan thu in an in pawm a, a bulah kan bag ken dah in kei ka thu ve bawk a, ka nau chiah mipa chu ka pa bus khalhna hnungah chuan nuam ti takin beding chungah ka pa motor khalhdan zirin nuam ti takin a thu bawk a.

      Sialsuk lam pan chuan kan tlanphei ta a, Sateek kan thlen chuan chhun thingpui in turin kan chawl a darkar khat vel kan chawlh chuan, kan tlan tan leh ta a, kawngkawi ka hmuh theih tawp a mi thingkung te chu kan thlen huntur chhinchhiah in kei pawh nuam ti takin ka chuang ve zel a, ka nu chuan kan te ber chu hnute a pe mek bawk a, chutia kan tlan lai chuan kawngkawi kawngchhuk deuh kan tlan lai chuan ka pa in a stearing a lo herh fan fan lai leh a break a tlawh pawh a ding thei lo kawi thei bawk silo tang lutuk chu ka zuk hmu ta a, kawngkawi kan thlen thlak chuan kawi zo tawh silo chu kan hma a Mau hmun leh changel hmun chu kan su liam thla ta a ni.Mau leh thing vel kan sut thlak lai chu ka la hria a ka hriat leh awmchhun chu ka hnungzang hi ka sawh leh dawttih ka hre bawk a, ka harhchhuah leh chuan hnimpik zingah hian pa pakhat nen in hmachhawn in kan lo awm a, chupa chuan mama ka malpui ruh leh ka ban ruh hi a tliak a ka che thei lo tih min hrilh a, kei chuan engmah pawh sawi lo chuan a sarhu lai a ni bawk a, thei leh theilo in ka vakchhuak a, khampang awih tak pethla hun chu ka hmu a a tawp ah chuan hmun zawl zau deuh hi a lo awm a chutah chuan kan chuanna Bus ngei ka pa khalh chu keh sawm rum in ka zuk hmu ta a.

      Chutah kan hawi vel a Bus keh sawm bul atang chuan ka pa chuan ka nu a lo ko vak vak lai chu ka zuk hmu ta a, theih tawp in ka han ko vak a ka aw chu a ri thei ta re re lo mai, ka bawk leh hnawk a changel hmun a nih vangin a kham hi a awih bawk si a, (Metre 300 dawn lai a thui kan lum) kei chu a sawh chhuah hmasak pawl ka lo ni hlauh zawk a, hetia chhiat kan tawh lai hi chhunlai reh lai tak a nih vang in motor la tam vak lo nen khua atangin lo hla tham bawk nen miin min rawn hre har hle.

(A hnu a an sawi ka hriat leh dan chuan lo a feh ten ri rum rum kan hria a a hma in Motor tlan thawn kan hre bawk sia kan ngaih tha lo chuan kan rawn zawng an ti).

      Chutia thei leh thei lo a ka vak chhuak chu ka lo chau deuh nge ka bawk leh kha ka che hlei thei ta lo a, mahse rei lo te ah hian pa pahnih hi hrui a in hling ah rawn uai thla in min rawn hmu ta a, kawngpui lama lakchhuah tum a min han chawi lawp chu ka Aiah tuarh a, zawi muangchang in min paw tha leh ta a. Kawngpui min thlenpui meuh chuan mi pawh an lo tam tawh hle mai a, kawngsirah chuan hliam dang te pwh an lo muttlar tir phei put mai a, a sir Ka nau leh ka pa pawh an lo la chhuak tawh a lo nia, kawngpui sir ah chuan beding chu an lo phah a kei pawh chu min muttir ve ta a.ka piah a mu chu doctor pakhat in a chalkak vun chhia a hlep hlawk lai chu ka va hmu a, kei chu pawn lamah hliam lian tham em em ti ila ka chal ka lu ah hian hmun 23 ah chuan an thui ve.

      Chutia an hlep hlawk ka hmuh chuan ka hlau em em a, ka pa leh ka nau chu an na vak lo a i nu leh i nau kan va zawng ange an tia an kal sawn ta a. Ka mutna hmazawn ah chuan Pioneer motor hi a ding a ruang an rawn lakchhuah te chu puan a tuam in chu truck hnungah chuan an vawrh kai lawp lawp hi ka hmu a, chu hmunah ngei chuan ka nu chu vawrh kai ve a lo ngai a ni tih hi thla ruk hnu ah chiah min hrilh bawk, mahse ka mitthla ah a cham reh thei lo a, ka nu an truck hnunga an vawrh kai dan tur ka ngaihtuah hian ka mittui a la tla thiin tuna ka type lai ngei pawh hian tlem chuan rilru a la na.

      Ka nu a thi nge thi lo tih pawh hre ve lo chuan Aizawl lamah phurh phei kan ngaih avang in hmanhmawh takin min rawn siam leh sawk sawk a Aibawk Bus seat pahnih chu thlawn in hliamdang te nen seat an thlawn ah chuan YMA thuthleng pathum an dah a beding an phah leh a ka nau nen chuan min mut tir ta a.Aizawl Civil Hospital kan thlen chuan tuna OPD an sakna tak hi assamtype a la nia Casualty ah an la hmang bawk a, ka nau nen chuan Casualty khum pakhat ve ve ah chuan min mut tir a ka nau a nak thler an thui tap vak vak lai ka va hmuh chuan ka rilru a na hle a, kei chu engtin mah min la khawih si lo a, a awmzia ka man lo hle.

(Tun hnu a min hrilh leh dan chuan hliam an tam si a, nangmah kha chu thi tho tho turah an ngai che a Doctor in an ngaihsak hman lo che a i Pute a hian a va nawr a a hnu ah an rawn ngaihven che anih kha tih min hrilh).

      Kan te ber hnute hne lai hi an zawn rei ber pawh a nia mahse a lum hla ber a a la kal thei lo nen an zuk hmuh chuan mau ah a lo in dawm ding an ti a. na pawh a nei lo a a khup a vung ve deuh tih mai a ni, ka nau chiah pawh karkhat bak damdawiin ah a awm lo a, ka pa pawh chutiang bawkin. Chutia casualty a kan buai nak nak hnu chuan engmah vak ka hre tawh lo a, ka harh chhuah leh chuan Puanzarhliah hnuai ah ka lo mu a ka ke lehlamah drip an khai a ka ben lehlam lehlam ah nen ka ke lehlam ah thisen an khai bawk a Oxygen min lo pe bawk a mahse min 5 pawh ka harh hma in min chiu mu nge ka hre lo ka muhil leh thin.

      Ni khat chu in zaina pilril ah chuan min luh pui ta a, ka mutna chu a huh deuh dup a khawl an ti ri vut vut a, pipe lianpui min pe a min ham tir a (hnimhlum a lo nia) ka harh leh chuan ka khum ah ka lo mu leh tawh a ka nak ah hian pipe an vuah a ka en thla zel a, Bur chhungah chuan thisen a lo far keuh keuh a, ka nakruh pali a tliak a chu chuan ka kawchhung vel ka chuap a chhun tel a, internal bleeding ka lo nei a lo nia, an lo siak chhuak mek a ni.

      Damdawiin ah chuan kumkhat teh meuh mai thutpawh thu lo in mu in ka awm a, ka that leh hnu pawn kal leh thut te pawh min zirtir tha leh vek nghe nghe a, Ka nu a thi tih hi ka that deuh hnu thlaruk ka awm hnu ah min hrilh ve chiah a, Ka nu vuina ah hcuan ka nau te ka pa te nen an tel vek a kei chu ka tel ve thei lo a lo nia, a hnu a thlalak ka hmuh leh a keima ngaihdan in. Chu chuan tunthlenghian ka rilru hi a la ti na vawng vawng thin ka nu hi in si rial a kan thut lai akan tlanliam tak hnu ah ka hmu leh tawh lo.

      Ka nu an vuini hian an vui haw lam chu a fapa a thi tiin ka lo thang leh pek a, chulai bawr chuan ka lo harhchhuak zo lo te pawh a ni awm e an sawi leh dan in, chutia thi anga min han sawi chu kan chhungkua a buai a an tap leh a ka kuang tur pawn an lo zaibung fel hman vek tawh a damdawiin atanga ka chhuah in min entir ka la hre reng bawk. Ka nu thlana min vui ve nghal mai tumin ka nu thlan pawh tlem an hai leh hman a ni awm e. He tih hunlai hian kum 6 mi ka ni. Ka Nu hliam tawrh hi a hnu a min hrilh leh dan chuan a bek lehlam lehlam ah thuk takin a khuar ve ve a, a malpui ruh a tliak ve ve a, a ngalruh tliak pheichu a rawn lawr chhuak a, a ring ruh a sawp vek bawk a, a taksa pawh thenfai a ngai nasa hle an ti. Hemi ka ngaihtuah let hian ka nu ka hmangaihna hian ka rilru a tina zual thin bawk.

      Tichuan damfel ang chuan ka awm chho ve ta a, ka dam loh lai khan kan zirtirtu ten exam miah lo in A ah vek min pass tir, ka la hre reng tun hnu a ka ngaihtuah let hian ka nuih te pawh a za. Chuan class 2 ah min tan tir a, lehkha lam chu ka thiam em em hran lo hehehe, Sikul chu kan han kal ta a ka nau te pawh sikul kal rual an rawn ni a, Nu awmlo chu a hahthlak khawp mai, ka pa kha khami accident na avvang khan a hna atangin an ban bawk nen, retheihna chuan min tlakbuak chho ta a, sikul kan kal leh tan chiah tih ah khan thlakhat vel hnu ah ka hnar hi class ah a rawn thi a, zirtirtu ten lapua nen an han hnawh pawhin a rawn tawn tlang zel a, hnar thi nasa lutuk chu in ah min dah a, a hnu reilo te ah thi in ka luak ta vak bawk a damdawiin lamah min dah leh ta a, hetah pawh hian thlakhat zet ka awm leh bawk. ka dam tha ve leh mai a sikul kan han kal a, kan te ber a tap puak ngai bawk si ka nau kaih ngai bawk si hruaitu kan nei bawk si lo, ka pa in private motor khalh in a hna attanga an ban avangin inhlawh a ngai bawk si.

      Tlai khat chu Sikul kan bang chu kawngka hi tala in a lo in kalh a, chahbi awmna kan hre silo kan la te bawk si nen, pawnah kan unau thum chuan kkan thu a, ka pa lo haw kan nghak ta thap a ka pa lo haw chu a rilru na lutuk a in sum thei lo chu a tap ta vak mai a, keini pawh chu kan vai chuan kan tap ta a, ti chuan ka pa ho chuan harsa tak in nun kan hmang chho ve ta a. mahse ka nu thihcham kumkhat a tling tih chuan rinphak piah lamin thil a lo thleng chho ta a.Ka phal lo chung chu ka pa chuan nupui dang anei leh ta mai si a, kei lah luhlul ve bawk nen ka nu tih ka lo harsat ve bawk si a, ka pa in nupui a neih leh hnu chuan kan unau chu chhungte hrang hrang bulah min sem darh ta a.

(Ka la naupan ve deuh avang hian a hunlai hian engmah hrethiam vek lo mah ila, tun hnuah hian a na thar duh khawp mai.)

      Kan chhung chuan ka nu thar nen Lunglei lamah te kum khat va awm in retheihnain min tlakbuak zel bawk a, ka mumangah hian ka nu hi zantin deuhthaw ka hmu thin a, zing ka thawh in a tak lo awm ngai lo nen, kei pawh ka suakbak zo a, ka nu thar chu ka nu tiin ka pawm thei ta reng reng lo a, kei pawh ka sual ve hrim hrim bawkin ka inhria, mahse rilru hi a khingbai tlat si a, Lungglei kan va awm chu sikul te kan kal ve takna a retheihna in min tlakbuak avangin thil harsa tak tak ka tih chang a tam mai, Ata (paratha) te ka zuar kual a naupang mai ka ni a, a changchuan ka zak ve thin hle. Vanduaina bawk ka tawng leh ta a, tukkhat chu ruah sur seng seng hnuai ah ka thiante nen kawlthei kan lo a, ka rap pelh chu ka tla ta a, pal hungna phelsep delh thlain na ka ti hle mai a, a tir phei chuan ka ke a che thei lo, ka kawngah hian inch 1 leh chanve vel zet a sei pahnih sikret tiat lawng hi a lut a, damdawiin lamah bawk ka awm leh ta a, vawi thum min zaina ah an phawrh thei tawk a, a va na tehreng em!!! Accident tawhna nen tun thleng hian ka kawng hi a that loh phah ta a ni.

      Engmah vak hrethiam lo leh naupang a mai kan la nih vang chuan unau inthendarhna chu a lo thleng ta a, kei chu ka pa chhungte lamah ka Pi leh Pu te hnen lamah min awm tir a ka nau nen, kan te ber chu ka nu chhungte lamah thingtlang lamah an la ve bawk a, chutiang chuan hringnun chu kan hmang chho tan ta a, ka nun ah thil harsa tak tak ka tawng chho ta a, ka kawng tha lo hi a chang chuan mut harsat chang ka ngah thin, mahse tuichawi, insuk, eirawngbawl te tih a lo ngai in zir a ngai bawk si a, naupang te mah ni ila ka nu ka ngaih ngawih ngawihna a reh thei silo, ka mumang a ka hmuh chang phei chuan ka lo tap chhuak nghe nghe thin a, tun thleng pawh hian mumang a hmuh chang ka la ngah mai.

      Tichuan, tleirawl kan lo ni chho ve ta a, mipa nih na na na chuan meizial zukruk te kan lo ching chho ve a, sualna hrang hrang lam khan rilru a la zawk mah thin a, mahse thil atthlak tak a lo ni. Chutiang teh nuaih anih chhoh vang chuan mal ngawih ngawiha inhriatna te thian te zinga inthlahrunna te mahni inrintawk lohna te chuan min bawm thin a, sikul leh thian te zingah pawh achang chuan chhaih nawmnah chang pawh ka lo tawng chho ta zeuh zeuh a, pawl 5 ka zir hian chhuatnawt ten pheikhawk nawt te pawn ka inhlawh tan tawh a, middle school kan kal chho phei chu inhlawhna rem a awm chuan inhlawh chang pawh a tam mai, rit ka chawi ni a nih phei chuan zan mut hi ka harsat thin a ka kawng nat lutuk vang a ni. Pi leh Pu te bul atang chuan pawl7 ka pass hnu hian ka Pate a bulah ka awm leh ta a, engkim thawk in vawkchaw chhum, tuichawi, insuk, eirawngbawl nen hna tuldang nen inthlahrung takin ka thawk ve mawp mawp zel a ni. Damloh hritlan khawsik pawn inthlahrunna avangin sawi ngam lo in ka tuar tlawk tlawk mai thin a, ka nu bawk hi ka ngaih em em leh ka mittui tlak hnemna ber zan pawh mu thei lo a min siam thin tu a ni bawk.

      Tichuan tleirawl sual chuan min nangchho ve ta zel bawk nen, ruihtheih thil chu ti lo mah ila, thu awihlohna leh luhlulna te thei intih riauna te mahni a din theih inrinna te a rawn lian chho ve zel a, High School ka kal chho ve tan ta bawk nen, inrinni a piang in mi insa ten ka inhlawh ve thin a, heta ka hriat reng chu kawngpui sir mai a hna kan thawh chang te hian thian te leh hmelhriat te hian min be tha peih ngai lo, mahse mahni a intodelh lo lutuk erawh ka ni ngai lo thung. Class 10 ka zirlai phei chuan tlanbo hrat ten min han nang ve leh a, a lo atthlak ngei mai, mahse engtin tin emaw chuan ka pass chho ve zel a. PU chu Hrangbana College ah morning ah kan han kal chho ve tan ta a, chutah pawh khawsa ho chiin kan han awm ve leh a, class a awm ai chuan thiante nen a canteen a thut te kha kan nuam tih ber a nia, kan thian ho kan pawl phei chu kan tam thei hle. Mahse kei chu class ban chuan ka haw lo ngam lo a, in lam che tur ber ka ni thin a, ka rilru chu a kal diklo tan ta a, beidawnna te rualawhna te lungngaihna te mal ngawih ngawih a inhriatna te chuan min rawn man tan ta a, ka hun tawn chu hahthlak ka tiin mut pawh harsa ka ti thin, mittui nen zan hun ka hman hi a tam zawk a ni. Hetih hunlai vek hian Kohhran ah ka in hmang chho ve zui mai bawk nen, Keyboard tum tu te ni chho in naupangte in Zaipawl conductor te kan ni chho ve leh zel a, mahse inthlahrunna mi zinga awm tih nawm lohna te, thil tamtak hian min tihbuai chang hi a tam zawk a ni. Thiante in mi in vela han len chang te hian Nu leh Pa nen a hlim taka an awm ka hmuh chuan zan lamah hi chuan ka in ngaihtuah lungpuam leh nge nge thin, chutiang a nun beidawng taka ka hman lai chuan mahni intihhlum duhna in min rawn thrawng ut ut mai a, vawihnih vel chu ka tum ve a mahse Pathian thatna vangin ka hlawhchham ve ve thung.

      

      Hun te a lo kal zel a a tawp a tawp ah chuan naupangte in ka nau nen chuan kan indang ta rawih mai a, mahse rei a daih lo hle engmah neih nei silo nen la naupan hawklak nen kan tithei lo a chha chu a ni leh ta der mai a, Heng hunlai hian Drugs hi Ephedrex an tih ang kha chu ka ti ve hman thla khat vel, mahse mak deuh mai chu Pathian min venna hi tun hnu hian ka hrechhuak uarh uarh thin, a engmah kha ka addict ve thei lo, ka ti chhin a ka ti leh lo nghal vang vang thei kha tun thlenga ka lawmna pawh a la ni. Chutia indang tha hleithei lo ta chu chhungte inah bawk kan let leh ta a. Khawvel nun hi a hrehawm ngawih ngawih a ni ber mai, ka pa te bulah chuan kan han let leh a, mahse an ni lamin fa an lo nei ve nual tawh nen keini lamah sawisel tur neuh neuh lo awm ve nen. Engkim inchhung khawsak te chu ti vek thin mah ila mit tlunna lai reng kan neihloh avang chuan thlathum hnu ah chuan ka chhuak leh ta tawp mai a, inluah tur ka zawng a ka indang ve leh ta a, rilru la puitling lo nen a harsa a ni. Mahse Pathian in talent tamtak min pe a thiam thil zir lemlo in ka lo nei ve zul a, a theih ang ang in hna ka thawk a, mahse chu chu a lo tawk hauh lo, zu in zeuh zeuh nen nun chu a buai chho leh ta a, hetih lai hian ka inluah man pawh ka la ba nghe nghe. Ka ning lutuk chu ka thianpa te in ka pan ta ngawt a heta ka thianpa hi ka fak khawp mai nupui neiin rethei te mah nise ka kalchhuah a phal tawh lo a, a thlum a alkan eiza ta a. Tunah hian tanpui let thei ka ni ta a ka lawm khawp mai bawk.

        A tawp a tawp ah chuan ka patea bulah bawk ka let leh ta a, ka patea bula ka let chu an a fapa nen an lo indang daih tawh mai a, kan pathum chuan kan han khawsa ve nawl nawl ta a. Zu in mi a lo ni nen tlaiah hnawhchhuah a zinga ngaihdam indil leh tih vel te kutinthlak chawrh lehthin kha ka tawn chu ani leh ta a, thiante in a riah te khawlai tei tlaivar mai mai te chuan ka nun chu a luah zing ta hle mai. Engpawh thawk ila inchhung sekrek engkim hmeichhia angin thawk vek mah ila keini ang lakah hi chuan midangten lungawina kim an hmu thei lo tih hi ka chiang bawk a ni. Zankhat chu thil diklo taka min puhin ka thawmhnaw a zaichhe chiam mai a, mi kutthlak ngai miah lo ka nihna chu insum thei lo in ka nawr bet rawk a ka thawmhnaw leh khawlbawm a pawisa tlem chu la in ka chhuak ta tawp a. Inluah tur ka zawng a tawp ah a bang dap ka hmu ve ta hram a, bungbel nei bawk silo leh puanthuah pawh nei silo chuan Puan hlap pakhat chu ka nei ve ka indang ve leh ta rawih mai a, hnathawh tur vang nen a rem rem a ka inhlawh a mi lungrem a helper ten mi insa ten ka inhlawh a, mahse ka kawng bawk hiana tlin loh vangin ka thawk rei thei silo.

      Hun chu a lo kal zel a ka kawng vang chuan buaina ka tawk ta a, hna rei tak ka thawk thei silo, eitur neilo in ka awm ta reng mai, hetih hunlai hian kan thenawm te vawkchaw te hi ka hmutai a ei mai ka chak thin, karkhat chhung temeuh tui ringawt in chuan ka khawsa a, ka tawngtai ta tawp a Pathian engkim ti thei a chuan min rawn awmpui leh ta a, private ah hna chhete te hmuin ka thawk ve leh naw naw a, chuta ka thawhna ah chuan Computer hman ngaihna a ni a, a rukin an haw hnuah ka on a plugah kan off leh a engmah la thiam ta lo chuan, an tihdan te ka enthla ru leh a a hhnu chuan card rem te ka lo thiam chho ve leh ta a. Tichuan ka vannei a siamin ka thianpa pakhat awmthei deuh hian Computer lam dawr hi a nei hlauh mai a, zanah te mumang lo in kan khawih chho ta a, he hun hi ka tan chuan thil lawmawm a ni a, a ma hnenah pawh lawmthu ka sawi thin tun hnu pawh hian, ui miah loin duh duh min khawih tir a, min zirtir da a thiam chuang lo a ka risk ve pawp pawp a, a hnu ah chuan rualpawl takin ka lo khawih ve thei ta a ni.

      Tichuan ka rilru chu lo harh tharin ka ngaihtuahna te ti thar in hmelhriat te ka nei thar zel a internet lam te ka lo khawih uar ve bawk nen, hmelhriat tha tak ka chhar ta a, chumi a tang chuan Video Editing lam thleng thlengin ka lo thiam ti ila mi angin thiam lo mah ila ka lo ti thei ve ta a, chutah a nihman lo nen a dawr te chu ka rochun ve zel a, pangngai tak in nun chu ka hmang chho thei ta a ni.

        Heng harsatna ka tawh lai hian ka rilru beidawng mangang hi ka nu thlanah te Zan dar 12 vela ka kal a ka va biak mawlh mawlh chang te ka va tah vawng vawng chang te pawh a tam thei hle. Mi insak lai a riah tlaivar te, khawvawt hnuai a field kil sir a khur zawih zawih a ka thut tlaivar te, mi motor hnunga ka riah tak mai mai te, sawi tur a tam mai, mahse tul ka tih ber a ni lem lo. Tin enge ka tawn hrechiag miah lo a pawnlam ataga min sawichhe tu pawh ka ngah hle a, mihring chuan sual hunlai fel hunlai te kan nei thin, kei pawhka tling vek bik chuang lo a, mahse miin enge harsatna an neih tih hre miah lo a, sawi chhiat chiam chiam te hi a tha ber lem lo ni. mahse engkim hi kan thatna turin Pathian in a lo ruat vek a lo ni. Tin harsatna ka tawh lai hian thian tha tamtak Pathian in min pe a an hminga han sawilan kher tul ka ti hran lo a, an chungah ka lawm em em bawk tun thlengin ka thiantha te an la ni reng a ni.

        Tunthleng hian ka harsatna tawhna kawnga ka kawng zawh lai mek ah pawh hian hmuhsitna tam tak tawng elna chi hrang hrang ka tawng mek zel a. Mahse Pathian hi a that em avangin hriatthiamna tam tak nen ka nun hi ka hmang chho ve thei ta a, a chang chuan rilru na vawng vawng a zan muttheih loh chang pawh hi a la tam thin khawp mai.

      Thu hi ka ziak thiam lutuk lo a, a inkar thlak deuh nuaih maithei ni chhiartute hriatthiamna ka ngen a, a tawi thei ang berin ziah ka duh ve si a thil tamtak ziah kimloh pawh awm mahse ka rawn tarlang ve thuai mai a ni. Hei hi ka sawi duh pakhat chu a ni mihring te hian rethei ber emaw kan intih lai hian keini aia rethei hi an lo awm ve zel a, hrehawm te harsatna te Beidawnna te kan tawh chang hian Pathian theihnghilh a sual lam kawng zawh a awl hle tih hi a hrechiang tu ka ni a, Keimah ang nun nei tamtak mahni nunna la te vuiliam tak te Drugs leh sual khura lut ta an tam tih ka hria. Mahse kan tum phawt chuan engkim hi kan tawn tlang thei a ni tih hi ka sawi ve duh a. Ka hrehawm tawrh zawng zawng pawh hi ka ziakchhuak vek lem lo a, a tul pawh ka ti chuang lo mite hmuhsit leh endawng ni mah ila Zangkhua hi a la bungbu thei ani tih hi mi zawng zawng ka chah duh che u a ni.

(Heng ka thu ziak zawng zawng hi ka thiante bulah pawh ka la sawichhuah ngai loh a nia, inthlahrung angreng takin ka rawn ziakchhuak a ni. Hetiang lam han ziah hi mi thenkhat rilru ah chuan insawi khawngaihthlak tum tih ten sawirik a awm thin a. Mahse chutiang lam hawizawng chuan ka ziak lo tih min lo hriatsak bawk turin ka chah duh a che u)