CMD OLD REFRESH

 cmd

reg.exe add "HKCU\Software\Classes\CLSID\{86ca1aa0-34aa-4e8b-a509-50c905bae2a2}\InprocServer32" /f /ve

Task Manager 

Windows Explorer Restart

KAN CHHIATTAWH THU

KAN CHHIATTAWH THU

Hriatpuii Pa

      Kum 1983 May ni 27 a rawn inher chhuaka (ka pa hi MST Bus driver a ni) zing nichhuah hmain ka nu ho chuan kan insiam a ka pa Sialsuk lama a zin dawn tum anih vangin ka nu chhungte tlawh turin zin ve turin, tuna Synod Bookroom kawtah hian ka nu hoin ka naute pahnih nen bus chu kan lo chang a, zing dar 7 velah chuan bus chu a lo thleng ta a, Bus tawi chi a nih vang nge Bus chu a tawt hle mai a seat a lenglo pawh a kalkawngah chuan an thu khat vek a, ka nu chu conductor-in a thutna a ken avangin kan te ber hnute hne lai nen chuan thuin an in pawm a, a bulah kan bag ken dahin kei ka thu ve bawk a, ka nau chiah mipa chu ka pa bus khalhna hnungah bedding chungah ka pa motor khalh dan zirin nuam ti takin a thu bawk a.

      Sialsuk lam pan chuan kan tlanphei ta a, Sateek kan thlen chuan chhun thingpui in turin kan chawl a darkar khat vel kan chawlh hnu chuan, kan tlan tan leh ta a, kawngkawi ka hmuh theih tawp a mi thingkung te chu kan thlen huntur chhinchhiah in kei pawh nuam ti takin ka chuang ve zel a, ka nu chuan kan te ber chu hnute a pe mek bawk a, chutia kan tlan lai chuan kawngkawi kawngchhuk deuh kan tlan lai chuan ka pa in a stearing a lo herh fan fan lai leh a break a tlawh vak vak pawhin a ding thei lo stearing kawi thei bawk silo tang lutuk chu ka zuk hmu ta a, kawngkawi kan thlen thlak chuan kawi zo tawh silo chu kan hmaa Mau hmun leh changel hmun chu kan su liam thla ta a ni. Mau leh thing vel kan sut thlak lai chu ka la hria a, ka hriat leh awmchhun chu ka hnungzang hi ka sawh dawt tih ka hre leh bawk a, ka harhchhuah leh chuan hnimpik zingah hian pa pakhat nen in hmachhawnin kan lo awm a, chupa chuan mama ka malpui ruh leh ka ban ruh hi a tliak a ka che thei lo tih min hrilh a, kei chuan engmah pawh sawi lo chuan a sarhu lai a ni bawk a, thei leh theilo in ka vakchhuak a, khampang awih tak pethla hun chu ka hmu a, bus lum tawpnaah chuan hmun zawl zau deuh hi lo awmin chutah chuan kan chuanna Bus ngei ka pa khalh chu keh sawm rum in ka zuk hmu ta a ni.

 

      Chutah kan hawi vela Bus keh sawm bul atang chuan ka pa chuan ka nu a lo ko vak vak lai chu ka zuk hmu ta a, theih tawp in ka han ko vak a ka aw chu a richhuak thei ta reng remh lo mai, ka bawk leh hnawk a changel hmun a nih vangin a kham hi a awih bawk si a, (Metre 300 dawn lai a thui kan lum) kei chu a sawh chhuah hmasak pawl ka lo ni hlauh zawka, hetih hunlai tak hi khaw dai ni tawh si chhunlai reh lai tak a nih vangin motor la tam vak lo nen khua atangin a hla tham bawk nen miin min rawn hre har hle.

 

(A hnu a an sawi ka hriat leh dan chuan lo a feh ten ri rum rum kan hria a a hma in Motor tlan thawn kan hre bawk sia kan ngaih tha lo chuan kan rawn zawng an ti).

      Chutia thei leh thei lo a ka vak chhuak chu ka lo chau deuh nge ka bawk leh kha ka che hlei thei ta lo a, mahse rei lo teah chuan pa pahnih hrui a inhling chunga rawn uai thla chuan min rawn hmu ta a, kawngpui lama lakchhuah tum a min han chawi lawp chu ka aiah tuarha, zawi muangchang in min paw tha leh ta a. Kawngpui min thlenpui meuh chuan mi pawh an lo tam tawh hle, kawngsirah chuan hliam dang te pawh an lo muttlar tir phei put mai a, ka nau leh ka pa pawh an lo la chhuak tawh a lo ni a, kawngpui sirah chuan bedding chu an lo phaha kei pawh chu min muttir ve ta a. Ka piaha mu chu doctor pakhat in a chalkak vun chhia a hlep hlawk lai chu ka va hmu a, kei chu pawn lamah hliam lian tham em em ti ila ka chal ka luah hian hmun 23 ah chuan an thui ve. Chutia an hlep hlawk ka hmuh chuan ka hlau em em a, ka pa leh ka nau chu an na vak lo a, i nu leh i nau kan va zawng ange an tia an kal sawn ta a. Ka mutna hmazawnah chuan Pioneer motor truck hi dingin ruang an rawn lakchhuah te chu puan a tuamin truck hnungah chuan an vawrh kai lawp lawp hi ka hmu a, chu hmunah ngei chuan ka nu chu vawrh kai a lo ngai a ni tih hi thla ruk hnuah chiah min hrilh bawk, mahse ka mitthlaah a cham reh thei lo a, ka nu truck hnunga an vawrh kai dan tur ka ngaihtuah hian ka mittui a la tla thin tuna ka type lai ngei pawh hian rilru a la na vawng vawng khawp mai.

 

      Ka nu a thi nge thi lo tih pawh hre ve lo chuan Aizawl lamah phurh phei kan ngaih avangin hmanhmawh takin min rawn siam leh sawk sawk a. Aibawk Bus seat chu thlawnin YMA thutthleng sei an dah a, a chungah bedding an phah leh a, ka nau ka chhangchiah leh hliam tuar dangte nen Aizawl lam min panpui ta a ni. Aizawl Civil Hospital kan thlen chuan tuna OPD building thar an sakna lai tak hi Assam type a la ni a, Casualty-ah an la hmang bawk a, ka nau nen chuan Casualty khum pakhat ve veah chuan min muttir a, ka nau a nak thler an thui a tap vak vak lai ka va hmuh chuan ka rilru a na hle a, kei chu engtin mah min la khawih si lo a, a awmzia ka man lo hle.

(Tun hnua min hrilh leh dan chuan hliam an tam si a, nangmah kha chu thi tho tho turah an ngai chea Doctorin an ngaihsak hman lo chea i Pute a hian a va nawr hnuah an rawn ngaihven che anih kha tih min hrilh).

 

      Kan te ber hnute hne lai hi an zawn rei ber ni mahse a lum hla ber a, a la kal thei lo nen an zuk hmuh chuan mauah a lo in dawm ding an ti. Na pawh a nei lem lo a khup avung ve deuh tih mai a ni. Ka chhang chiah pawh karkhat bak damdawiinah a awm lo a, ka pa pawh chutiang bawkin. Chutia casualty-a kan buai nak nak hnu chuan engmah vak ka hre tawh lo a, ka harh chhuah leh chuan Puanzar hliah hnuaiah ka lo mu a, ka ke veilamah chuan drip an khai, ka ke dinglamah thisen an khai bawk a, ka ban lehlam lehlamah drip an khai bawk. Oxygen chu ka hnarah an lo vuah bawk a, mahse min 5 pawh ka harh hmain min chiu mu nge ka hre lo ka muhil leh thin.

 

      Ni khat chu in zaina pilrilah chuan min luh pui ta a, ka mutna chu a huh deuh dupa khawl an ti ri vut vut a, pipe lianpui min pe a min ham tir a (hnimhlum a lo ni) ka harh leh chuan ka khumah ka lo mu leh tawh a ka nakah hian pipe an vuaha pipe chu ka en thla zel a, Bur chhungah chuan thisen a lo far keuh keuh a, ka nakruh pali a tliaka chu chuan ka kawchhung khawihin ka chuap a chhun tel a, internal bleeding ka lo nei a lo ni a, an lo siak chhuak mek a ni.

 

      Damdawiinah chuan kumkhat teh meuh mai thutpawh thu lo, mu char charin ka awm a, ka that leh hnu pawn kal leh thut te pawh min zirtir tha leh vek nghe nghe, Ka nu a thi tih hi ka that deuh hnu thlaruk ka awm hnuah min hrilh ve chiah a, ka nu vuinaah chuan ka nau te leh ka pa te chu an tel vek a kei chu ka tel ve thei lo a lo ni, a hnua thlalak ka hmuh leh hnua keima ngaihdanin. Chu chuan tun thleng hian ka rilru hi a la ti na vawng vawng thin. Ka nu kha insi riala kan thut laia kan tlanliam tak hnuah ka hmu leh tawh lo a ni.

 

      Ka nu an vui ni hian an vui haw lam chu a fapa a thi tiin ka lo thang leh pek a, chutih hunlai bawr chuan ka lo harhchhuak zo lo te pawh a ni awm e an sawi leh danin, chutia thi anga min han sawi chu kan chhungkua pawh an buai nasa hle a ni awm e, ka kuang tur pawh an lo zaibung fel hman vek tawh a, damdawiin atanga ka chhuah hnuin thingphek an zaibun tawh chu min entir nghe nghe a ni. Ka nu thlana min phum ve nghal mai tumin ka nu thlan pawh tlem an hai leh hman a ni awm e. He tih hunlai hian kum 6 mi ka ni. Ka Nu hliam tawrh hi a hnu a min hrilh leh dan chuan a bek lehlam lehlamah thuk takin a khuar ve ve a, a malpui ruh atliak ve ve a, a ngalruh tliak pheichu arawn lawrchhuak a, a ring ruh a sawp vek bawk a, a taksa pawh thenfai a ngai nasa hle an ti. Hemi ka ngaihtuah let hian ka nu ka hmangaihna hian ka rilru a ti na zual e em em thin bawk.

 

      Tichuan, damfel ang chuan ka awm chho ve ta a, ka dam loh lai khan kan zirtirtu ten exam miah loin A-ah vek min pass tir, tun hnua ka ngaihtuah let hian ka nuih te pawh a za. Chuan class 2-ah min tan tir a, lehkha lam chu ka thiam em em hran lo hehehe, Sikul chu kan han kal tan leh taa ka nau te pawh sikul kal rual an rawn ni chho ve ta, Nu awmlo chu ahahthlak khawp mai, ka pa kha kan accident na vang khan ahna atangin an ban bawk nen, retheihna chuan min tlakbuak chho ta a, sikul kan kal leh tan chiah tih ah khan thlakhat vel hnu ah ka hnar hi class ah a rawn thi a, zirtirtu ten lapua nen an han hnawh pawhin a rawn tawn tlang zel a, hnar thi nasa lutuk chu in ah min dah a, a hnu reilo te ah thi in ka luak ta vak bawk a damdawiin lamah min dah leh ta a, hetah pawh hian thlakhat zet ka awm leh bawk. ka dam tha ve leh mai a sikul kan han kal a, kan te ber a tap puak ngai bawk si ka nau kaih ngai bawk si hruaitu kan nei bawk si lo, ka pa in private motor khalh in a hna attanga an ban avangin inhlawh a ngai bawk si.

 

      Tlai khat chu Sikul kan bang chu kawngka hi tala in a lo in kalh a, chahbi awmna kan hre silo kan la te bawk si nen, pawnah kan unau thum chuan kkan thu a, ka pa lo haw kan nghak ta thap a ka pa lo haw chu a rilru na lutuk a in sum thei lo chu a tap ta vak mai a, keini pawh chu kan vai chuan kan tap ta a, ti chuan ka pa ho chuan harsa tak in nun kan hmang chho ve ta a. mahse ka nu thihcham kumkhat a tling tih chuan rinphak piah lamin thil a lo thleng chho ta a.Ka phal lo chung chu ka pa chuan nupui dang anei leh ta mai si a, kei lah luhlul ve bawk nen ka nu tih ka lo harsat ve bawk si a, ka pa in nupui a neih leh hnu chuan kan unau chu chhungte hrang hrang bulah min sem darh ta a.

(Ka la naupan ve deuh avang hian a hunlai hian engmah hrethiam vek lo mah ila, tun hnuah hian a na thar duh khawp mai.)

 

      Kan chhung chuan ka nu thar nen Lunglei lamah te kum khat va awm in retheihnain min tlakbuak zel bawk a, ka mumangah hian ka nu hi zantin deuhthaw ka hmu thin a, zing ka thawh in a tak lo awm ngai lo nen, kei pawh ka suakbak zo a, ka nu thar chu ka nu tiin ka pawm thei ta reng reng lo a, kei pawh ka sual ve hrim hrim bawkin ka inhria, mahse rilru hi a khingbai tlat si a, Lungglei kan va awm chu sikul te kan kal ve takna a retheihna in min tlakbuak avangin thil harsa tak tak ka tih chang a tam mai, Ata (paratha) te ka zuar kual a naupang mai ka ni a, a changchuan ka zak ve thin hle. Vanduaina bawk ka tawng leh ta a, tukkhat chu ruah sur seng seng hnuai ah ka thiante nen kawlthei kan lo a, ka rap pelh chu ka tla ta a, pal hungna phelsep delh thlain na ka ti hle mai a, a tir phei chuan ka ke a che thei lo, ka kawngah hian inch 1 leh chanve vel zet a sei pahnih sikret tiat lawng hi a lut a, damdawiin lamah bawk ka awm leh ta a, vawi thum min zaina ah an phawrh thei tawk a, a va na tehreng em!!! Accident tawhna nen tun thleng hian ka kawng hi a that loh phah ta a ni.

 

      Engmah vak hrethiam lo leh naupang a mai kan la nih vang chuan unau inthendarhna chu a lo thleng ta a, kei chu ka pa chhungte lamah ka Pi leh Pu te hnen lamah min awm tir a ka nau nen, kan te ber chu ka nu chhungte lamah thingtlang lamah an la ve bawk a, chutiang chuan hringnun chu kan hmang chho tuam tan ta a, ka nunah thil harsa tak tak ka tawng chho ta a ni. Ka kawng tha lo hi achang chuan mut harsat chang ka ngah thin, mahse tuichawi, insuk, eirawngbawl te tih angaiin zir a ngai bawk si a, naupangte mah ni ila ka nu ka ngaih ngawih ngawihna a reh thei silo, ka mumang a ka hmuh chang phei chuan ka lo tap chhuak nghe nghe thin, tun thleng pawh hian mumang a hmuh chang ka la ngah mai.

 

      Tichuan, tleirawl kan lo ni chho ve ta a, mipa nih na na na chuan meizial zukruk te kan lo ching chho ve a, sualna hrang hrang lam khan rilru ala zawk mah thin a, mahse thil atthlak tak a lo ni. Chutiang teh nuaih anih chhoh vang chuan mal ngawih ngawiha inhriatnate thiante zinga inthlahrunnate mahni inrintawk lohnate chuan min bawm thin a, sikul leh thiante zingah pawh achang chuan chhaih nawmnah chang pawh ka tawng chho nasa hle, pawl 5 ka zir hian chhuatnawt ten pheikhawk nawtte pawhin ka inhlawh tan tawha, middle school kan kal chho phei chu inhlawhna rem a awm chuan inhlawh chang pawh a tam mai, rit chawi ngai ka thawh ni a nih phei chuan zan mut hi ka harsat thin a ka kawng nat lutuk vang a ni. Pi leh Pu te bul atang chuan pawl 7 ka pass hnu chuan ka Patea bulah ka awm leh ta a, engkim thawkin vawkchaw chhum, tuichawi, insuk, eirawngbawl nen hna tuldang nen inthlahrung taka awm chungin ka thawk nasa thin hle. Damloh hritlan khawsik pawhin inthlahrunna avangin sawi ngam loin ka tuar tlawk tlawk mai thin a, ka nu bawk hi ka ngaih em em leh ka mittui tlak hnemna ber, zan pawh mu thei loa min siam thintu a ni bawk.

      Tleirawl sual chuan min nang chho ve ta zel bawk nen, ruihtheih thil chu ti lo mah ila, thu awihlohna leh luhlulna te, thei intih riauna te, mahni a din theih inrinna te arawn lian chho ve zel a. High School ka kal chho ve tan ta bawk nen, inrinni apiangin mi insa ten ka inhlawh ve thin a, heta ka hriat reng chu kawngpui sir mai a hna kan thawh changte hian thiante leh hmelhriatte hian min be tha peih ngai lo, mahse mahni a intodelh lo lutuk erawh ka ni ngai lo thung. Class 10 ka zirlai phei chuan tlanbo hrat ten min han nang ve leh a, alo atthlak ngei mai, mahse engtin tin emaw chuan ka pass chho ve zel a. PU chu Hrangbana College-ah morning-ah kan han kal chho ve tan ta a, chutah pawh khawsa ho chiin kan han awm ve leh a, class a awm ai chuan thiante nen a canteen a thut te kha kan nuam tih ber a ni thin. Kan thianho kan pawl phei chu kan tam thei hle. Mahse kei chu class ban veleh ka haw lo ngam loa, in lam chetu ber ka ni thin a, ka rilru chu a kal diklo tan ta a, beidawnna te, rualawhna te, lungngaihna te, mal ngawih ngawih a inhriatna te chuan min rawn man tan ta a, ka hun tawn chu hahthlak ka tiin mut pawh harsa ka ti thin, mittui nen zan hun ka hman hi a tam zawk a ni.

 

Hetih hunlai vek hian Kohhran-ah theih ang angin ka inhmang chho ve zui mai bawk nen, Keyboard tumtute ni chhoin naupangte in Zaipawl conductor te kan ni chho ve leh zela, mahse inthlahrunna mi zinga awm nawm tihlohna te, thil tamtak hian min tihbuai chang hi a tam zawk a ni. Thiante in mi in vela han len changte hian Nu leh Pa nena hlim taka an awm ka hmuh chuan zan lamah hi chuan ka in ngaihtuah lungpuam leh nge nge thin, chutianga nun beidawng taka ka hman lai chuan mahni intihhlum duhna in min rawn tibuai chho ta a, vawihnih vel chu ka tum ve mahse Pathian thatna vangin ka hlawhchham ve ve thung.

 

      Hun te a lo kal zela atawp atawpah chuan naupangtein ka nau nen chuan kan indang ta rawih mai a, mahse rei a daih lo hle engmah neih nei silo nen la naupan hawklak nen kan tithei lo achha chu a ni leh ta der mai. Heng hunlai hian Drugs hi Ephedrex an tih ang kha chu ka ti ve hman thla khat vel, mahse mak deuh mai chu Pathian min venna hi tun hnu hian ka hrechhuak uarh uarh thin, a engmah kha ka addict ve thei lo, ka ti chhina ka ti leh lo nghal vang vang thei kha tun thlenga ka lawmna pawh ala ni. Chutia indang tha hleithei lo ta chu chhungte inah bawk kan let leh ta a. Khawvel nun hi a hrehawm ngawih ngawih a ni ber mai, ka pa te bulah chuan kan han let leh a, mahse an ni lamin fa an lo nei ve nual tawh nen keini lamah sawisel tur neuh neuh lo awm ve nen. Engkim inchhung khawsak te chu ti vek thin mah ila mit tlunna lai reng kan neihloh avang chuan thlathum hnuah chuan ka chhuak leh ta tawp mai a, inluah tur ka zawng a ka indang ve leh ta a, rilru la puitling lo nen a harsa a ni. Mahse Pathian in talent tamtak min pe a thiam thil zir lem loin talent ka nei ve zul a, a theih ang angin hna ka thawk a, mahse chu chu a lo tawk hauh lo, zu in zeuh zeuh nen nun chu a buai chho leh ta a, hetih lai hian ka inluah man pawh ka la ba nghe nghe. Ka ning lutuk chu ka thianpa te in ka pan ta ngawta heta ka thianpa hi ka fak khawp mai nupui neiin rethei te mah nise ka kalchhuah a phal tawh lo a,  thlum a al kan eiza ta a. Tunah hian tanpui let thei ka ni ta a ka lawm khawp mai.

 

        A tawp a tawpah chuan ka patea bulah bawk ka let leh ta a, ka patea bula ka let chu an nupa inthenin an fapa nen an lo indang daih tawh mai a, kan pathum chuan kan han khawsa ve naw naw ta a. Zu in mi alo ni nen tlaiah hnawhchhuah a zinga ngaihdam indil leh tih vel te kut inthlak chawrh leh thin kha ka tawn chu a ni leh ta a, thiante in a riah te khawlai tei tlaivar mai mai te chuan ka nun chu a luah zing ta hle mai. Engpawh thawk ila inchhung sekrek engkim hmeichhia angin thawk vek mah ila keini ang lakah hi chuan midang ten lungawina kim an hmu thei lo tih hi ka chiang bawk a ni. Zankhat chu thil diklo taka min puhin ka thawmhnaw a zaichhe chiam mai a, mi kutthlak ngai miah lo ka nihna chu insum thei loin ka nawr bet rawk a, ka thawmhnaw leh khawlbawm a pawisa tlem chu lain ka chhuak ta tawp a. Inluah tur ka zawngin a tawpah abang dap mi inhnuai ka hmu ve ta hram a, bungbel nei bawk silo leh puanthuah pawh nei silo chuan Puan hlap pakhat chu ka nei ve ka indang ve leh ta rawih mai a, hnathawh tur vang nen a rem remah ka inhlawh a mi lungrema helper ten mi insa ten ka inhlawh a, mahse ka kawng bawk hian a tlin loh vangin ka thawk rei thei silo.

 

      Hun chu a kal zel a ka kawng vang chuan buaina ka tawk ta a, hna rei tak ka thawk thei silo, eitur neilo in ka awm ta reng mai, hetih hunlai hian kan thenawm te vawkchaw te hi ka hmutai a, ei mai ka chak thin. Karkhat chhung temeuh tui ringawt in chuan ka khawsa a, ka beidawng lutuk chu ka tawngtai ta tawpa Pathian engkim ti theia chuan min rawn awmpui leh ta, private-ah hna chhete hmuin ka thawk ve a, chuta ka thawhnaah chuan Computer hman ngaihna a ni a, a rukin an haw hnuah ka on a plugah kan off leh a engmah la thiam ta lo chuan, an tihdan te ka enthla ru leh a ahnu chuan card rem te ka lo thiam chho ve leh ta a. Tichuan ka vannei a siamin ka thianpa pakhat awmthei deuh hian Computer lam dawr hi a nei hlauh maia, zanah te mumang loin kan khawih chho ta a, he hun hi ka tan chuan thil lawmawm a ni a, ahnenah pawh lawmthu ka sawi thin tun hnu pawh hian, ui miah loin duh duh min khawih tira, min zirtir dan a thiam chuang loh avangin ka risk ve pawp pawp a, a hnuah chuan rualpawl takin ka lo khawih ve thei ta a ni.

 

      Tichuan ka rilru chu lo harh tharin ka ngaihtuahnate ti tharin hmelhriat te ka nei thar zel a internet lam te ka lo khawih uar ve bawk nen, hmelhriat tha tak ka chhar ta a, chumi a tang chuan Video Editing lam thleng thlengin ka lo thiam ti ila mi angin thiam lo mah ila ka lo ti thei ve ta a, chutah ka thianpa hman lo nen a dawr chu ka rochun ve zel a, pangngai takin nun chu ka hmang chho thei ta a ni.

        Heng harsatna ka tawh lai hian ka rilru beidawng mangang hi ka nu thlanah te Zan dar 12 velah te pawh kalin ka va biak mawlh mawlh chang te ka va tah vawng vawng chang te pawh atam thei hle. Mi insak laia riah tlaivar te, khawvawt hnuaia field kil sir a khur zawih zawih a ka thut tlaivar te, mi motor hnunga ka riah tak mai mai te, sawi tur a tam mai, mahse tul ka tih ber a ni lem lo. Tin enge ka tawn hrechiag miah loa min sawichhetu pawh ka ngah hle, mihring chuan sual hunlai fel hunlaite kan nei thin, keipawh ka tling vek bik chuang lo, mahse miin enge harsatna an neih tih hre miah loa, sawi chhiat chiam chiam te hi a tha ber lem lo. Mahse engkim hi kan thatna turin Pathian in alo ruat vek a lo ni. Tin, harsatna ka tawh lai hian thian tha tamtak Pathian in min pea an hminga han sawilan kher tul ka ti hran lo a, an chungah ka lawm em em bawk tun thlengin ka thiantha te an la ni reng a ni.

 

        Tun thleng hian ka harsatna tawhna kawnga ka kawng zawh lai mekah pawh hian hmuhsitna tam tak tawng elna chi hrang hrang ka tawng mek zel a. Mahse Pathian hi athat em avangin hriatthiamna tam tak nen ka nun hi ka hmang chho ve thei ta a, achang chuan rilru na vawng vawng a zan muttheih loh chang pawh hi a la tam thin khawp mai.

 

      Thu hi ka ziak thiam lutuk lo a, a inkar thlak deuh nuaih maithei chhiartute hriatthiamna ka ngen a, atawi thei ang berin ziah ka duh ve si a thil tamtak ziah kimloh pawh awm mahse ka rawn tarlang ve thuai mai a ni.

 

Hei hi ka sawi duh pakhat chu a ni, mihringte hian rethei ber emaw kan intih lai hian keini aia rethei hi an lo awm ve zela, hrehawmna te, harsatna te, beidawnna te, kan tawh chang hian Pathian theihnghilha sual lam kawng zawh a awl hle tih hi a hrechiang tu ka ni a, keimah anga fahrah rethei tam tak mahni nunna la vuiliam tak te, drugs leh sual khura lut ta an tam tih ka hria. Mahse kan tum phawt chuan engkim hi kan tawn tlang thei a ni tih hi ka sawi ve duh a. Ka hrehawm tawrh zawng zawng pawh hi ka ziakchhuak vek lem lo a, a tul pawh ka ti chuang lo mite hmuhsit leh endawng ni mah ila Zangkhua hi a la bungbu thei a ni tih hi kan hriat reng a tha a ni.

 

(Heng ka thu ziak zawng zawng hi ka thiante bulah pawh ka la sawichhuah ngai loh a ni a, inthlahrung angreng takin ka rawn ziakchhuak a. Hetiang lam han ziah hi mi thenkhat rilruah chuan insawi khawngaihthlak tum tih ten sawirik a awm thin a. Mahse chutiang lam hawizawng chuan ka ziak lo tih min lo hriatsak dawn nia)

 

Tonic Solfa

Solfa hi mizo ten kan hriat lar zawk kan hlabu nen a inkawp tlat a nih avangin, kan tangkaipui tak in tiin ka hriat thenkhat te ka rawn sawifiah ve chhin dawn ange, he thil hi ka buatsaihna a rei deuh tawh a Kristian Hla Bu (KHB) tih hi a hlui kha a la ni e.

1. Appogiatura : A ri tur lamrik hma a ridang tawite a lamrik zawk tur Solfa note tereuhte note pangngai hmaah an dah thin (KHB 161)

2. Beat/Pulse(vuak) chhinchhiahna :
(a) Bar pui (|) : Hemi bula solfa note chu uar taka sak tur
(b) Bar te (/) : Hemi bula solfa note chu uar lo deuhin
(c) Colon (semi bar) (:) : Hemi bula solfa note chu dim deuh tur

3. Vuak zat : Vuak 2 - rang tho at in
Vuak 3 muang dam deuhin
Vuak 4 rang deuhin
Vuak 6 Thleh loh chuan a muang a, thleh chuan a rang

4. Crescendo (cres) : Sak riin tial tial tur (KHB 126,128)

5. Comma (,) : vuak khat hmun 4 a thenna a ni (KHB 203,425 etc.) Vuak khat hmun 3 a then nan comma letling an hmang thin (KHB 63, 214 etc.)

6. Corona/Fermata/Pause (asign hi ka type thiam lo kual chho alaia dot awm): Duh chen chen thluk theih
7. Dash (-) : Vuak chhinchhiahna dawta a awmin thluk tur a ni a, a dawt leh vuak thleng thluk tur
8. Dot (.) : Vuak chanve Dot zawh a Solfa note emaw Dash emaw a awm loh chuan Dot awmna ah thluk tawp tur (KHB 88, 369) Solfa note chunga a awm pawhin vuak chanve ah thluk tawp tur

9. Double bar (||) : Hla tawpah an dah thin. Bracket a tel ngailo, thlukna hmun a a awmin duh chen chen thluk theih (KHB 134 thunawn luh leh dawn). Chawlhna hmun a a awm in duh chen chen chawlh theih, mahse thluk loh tur (KHB 108). Hlawm khat thenna a tan hman theih (KHB 56 thluk 2 na)

10. D.C.( Da capo) : Solfa bulah let leh tur
11. D.S (Dal segno) : Segno (:$:) awmna hmunah let leh tur
12. Decrescendo (>) (Decres.) : zawi tial tial in sak tur (KHB 19, 23, 126)
13. Diminuendo (dim) : tihnem tial tial tur (KHB 453)
14. Fine : A tawpna
15. Flat (b) : A ripui aia a chanve a hniam
16. Forte (f) : Sak rin tur (KHB 42, 74, 88, 105....)
17. Fortissimo (ff) : Ring takin (KHB 42, 74, 128)
18. Mezzo (m) : Aw rindan pangngaiin (KHB 369)
19. Mezzo Forte (mf) : Aw pangngai aia ring deuh (KHB 126, 172)
20. Mezzo Piano (mp) : Nem deuh hlek in, Piano aia nem lo in
21. Piano (p) : Tihnem tur (KHB 8, 29, 74, 128....)
22. Pianissimo (pp) : Nem lehzual (KHB 299, 76, 88, 128..)
23. Pressure (<) : A awmna zawn Solfa note chu uar thut tur (KHB 108)
24. Ritenuto (rit) : Muang thut (KHB 65, 143, 145, 161...)
25. Ritardando (ritard) : Muang tial tial (KHB 121, 238, 439)
26. Rallentando (rall) : Ritard anga sak (KHB 300, 405)
27. Sharp : Ripui aia ri chanve a sang
28. Slur : Solfa hnuaia rinin a huam chin chu hla thu ngaia thluk kawi tur
29. Irregular Slur : Chhunhan rin (dot line) huamchhungah hlathu a tam chuan slur lovin sak tur, a thu a tlem chuan slur tur (KHB 91)
30. ://: A thu ngai sak nawn tur

Part hrang hrang te:
Air : Solfa hlawma tlar chung ber, hnamhla thluk sawinan an hmang bawk, mipa in solfa tlar chungber an sakin Air an ti bawk
Suprano : Hmeichhe aw sang, Solfa tlar chungber satute
Contralto : Hmeichhe aw hniam, Solfa tlar hnihna satute
Alto : Mipa aw ki sang, Contralto line satute
Treble : Mipain air an sakin treble an ti
Tenor : Mipa aw sang, Solfa tlar thumna satute
Bass : Mipa aw hniam, Soolfa tlar hnuai ber satute
Baritone : Mipa aw, Bass leh Tenor inkar
Descant : Part hrang hrang pangngai baka a pawlhmawi tur a risang danglam a part dang siam (KHB 27 thluk 2 na)

Chunnu..........

Kei ka Chunnu ve kha khawiah tak awm ang maw? Ni tin zan tin bang lovin thinlung chhungril berah hian theihnghilh chu sawi loh englai mai pawh hian a rawn lang thar thin zawng a nih hi. Chunnu hmangaihna hi chu a va thuk in a va hlu em, mihring tawng leh vantirhkoh tawng pawh hian a sawifiah thiam in ka ring lo. Chunnu tello a damlai par tlan hi lei hremhmun ti ila a sawifiah chiang ber awm e, hmuhsitna, endawngna, lungngaihna etc, kawng hrang hrang hian nitin zantin hian min bawm mai si a. Hriatthiam a harin tawrh thiam hi chu a har a ni.

Ka Nu duhtak khawnge i awm?.. i damlai a hringnun kan hmang dun tlem kha chu, ka hringnun hian a chhiat phah a sin, ka nu i tello a khawvel hman hi hrehawm kan va ti tak em i hraileng te hian, nitin zantin kan zawngin kan au che min chhangtu i awm silo, ngatinge ka nu duhtak heti mai a mual min liamsan le. I tangnem ka belh lai kha ka hmuh hnuhnun ber che chu a ni mai si a, thihna tenawm tak i chan hnu a i thlan lung chauh hi kan chantawk a ni ta mai si. Aw thihna tenawm ngatinge ka nu kher kher hi i lo man ve le, chhungkaw hlim hian hun kan la hmang tlem a sin, mahse tihtheih dang a awm tawh silo, ka Nu duhtak i ruang hmu lo a ka awm hi tun kum tamtak liam tawh ah pawh hian ka la hrethiam thei lo a sin, thihna thlanthim ah chuan a man tak tak che a maw. Ka ring thei lo ka ring thei mawlh lo, nitin zan tin hian ka zawng thin che a sin, miten chunnu tang an bel a i tang belh tur zawng in kan vai ruai thin a sin. Ka Nu duhtak i hraileng te hian lo kir leh la kan va ti em......

CHUNNU I TELLO CHUAN by : Hriatpuii_Pa

Damlai nunhlui dawn changin
Chhungkim ten kan lenlai ni te
Kan ngaizual thin i hraileng ten
Nang chuan min ngai lo ten, mual min liamsan si a
Kan nghilh lawng che kan dam chhungin

I sakhming kan sawi ning lo Chunnu kan ngai em che
Luaithli nulin kan au ruai ruai che
Lokir leh la kan run chhung ah
I hrailengte lunglawm ve nan

Awmlailian chang silovin
Engah min kalsan tak mai le
Kan ngaithiam lo kan tuar thiam lo
Chunnu i tello chuan hlimni awmhian kan ring lo
kan nghilh lawng che kan dam chhungin

Miten Chunnu tang bel in
Hlimten kumsul an hmang liama
Ariangten lengin i hraite
Chunnu i tang Belh ve kan chak em e
Kan nghilh lawng che kan dam chhungin

He hla hi 1994 khan ka Nu tan a ka phuah ve liau liau a ni a, a thluk nen mahse sak chhuah loh in a la awm rih a ni......

MI THIANGHLIM LAWR by: Hriatpuii_Pa

Kum 2... kum thar ni alo in her chhuak mek a. Zonuam khuaah pawh kum thar ni inkhawm hman loh hlauvin mitin te chu an insiam sung sung a. Kohhran lam pawh kumthar ni a ruai theh hman turin khawtlang nu leh pa tlangval thenkhat ten ei tur siamin an buai ve hle a; a hma zan a lo tlaivar nula tlangval tam tak te pawh an la mu vumthur hlawm a.

Dar 11:00 A.M a lo rik chuan Biak in dar chu a ri ta bulbul mai le. Nu nau inkhawm tur te chuan biak in lam an pan sung sunga, in khawm ve peih lo Pa ho leh tlangval thenkhat te chu ni lum ai pahin zahmawh sawiin an nui thler duar duar hlawm bawk a. Chutih lai chuan veng mawnglam a chhungkaw rethei ve tak, Namnilenga an tih mai te chhungkua chu an awm a, an nu pawh chuan inkhawm duh ve eng ang mahse a hman thlawtlo a ni ber e. Retheih nak-a-laiin, an la chhangchhe zui a, kum zawnin fa pathum lai an nei a. Chhungkaw pa ber lah inhlawh chawpin a rui vereng bawk a. Ei tur an neih loh chang pawh a tam, kumthar ni te a nibawk a, an nu chu insu turin daipawn a tuikhurah chuan em-ah thawmhnawbal a phur a, a fanu a kai a, an te ber chu hnap tla pir perin ahmathlak bawk a, an chhang chhe ve hle mai.

Inkhawm tan a lo hun dawn ta a, kumthar ni-a thusawi tur-a an ruat hi Upa. Lalkhirhvela a ni a, Pianthar that em em vang pawh nilo, hemi khua-a Sawrkar hnathawk officer awm ve pakhat kamding nih vang-a thlan tlin ni awm tak hmel pu hi a ni a. Chairman lah chu tiang deuh bawk Upa. Engthawla a ni bawk a. Veng tla birh lama kohhran upa rethei tak piangthar tha si Upa. Hrangchhinga leh Upa. Chhunthanga te chu Upa thutna-ah pawh a hnung lamah chuan an thu a, inkhawm chu an tan ta a.

Khaw dai lama nu chhangchhe tak insu pawh abuai ve hle mai. Tuikhur tui chu a fim tha hle a, van thla pawh a lang vek thei a, tuikhura tui suak tur a a kun leh lai tak chuan ribengchheng tak mai a lo ri a; van thla atang chuan eng rawn chhuak,van kak ruih mai chu a hmu thut mai a: a phu nasa lutuk hlau bawk si chuan a nau puak pawh a thlauh tep a. Chu van kak awng huau atang chuan thawmhnaw var nalh tak taka inthuam, thlawk thei si ho chuan tawtawrawt nen hma an rawn hruai a, a eng phut mai bawk a. Chu nu berh te retheitak pawh chuan mit tla lo lekin a en a.

Biak in lamah pawh chuan Lalkhirha'n Sermon a sawi pap papa. Chutih lai tak chuan ri bengchheng ri chu an han hria a. Biak inchhunga awm leh thusawitute pawh chu an ngawi ta thup mai a, 'engthilnge ni ta ang,?' tiin an beng an chhi hru hlawm a. Chutih lai tak chuan van eng phut chuan khawlai leh biakin vel chu a rawn chhun engphut mai a, tawtawrawt a rawn ri ruai ruai bawk a. Thil khu chem chem arawn leng chiai chiai a. Chutih lai tak chuan Upa. Hranghhinga leh Upa. Chhunthanga te chu van lam ah chuan an kang ta nul nul mai le!!!! Mipui an chiai zo, thusawitu leh chairman pawh an khur ru nasa tawh mai! A then tlan chhiat an tum, an en duh bawk si. Upa. Lalkhirhvela chu MITHIANGHLIM LAWR a ni ta, tiin a rawn au chhuak a, mipui an chiai lehzual. Tichuan Piangthar tha, rilru thianghlim ho chu van lam pan chuan an kang ta sung sung mai a, Upa. Engthawla leh Upa. Lalkhirhvela te pawh chu an kang ve thei silo kan ve tum in an zuang ru zuk zuk a. Mahse, an kang thei chuang lo! A thenin ngaihdam an dil, a sawt tawh silo.

Inkhawm ve lo pawn a nilum ai te ho pawh chuan, chu thil anhmuh chu mak tiin an thlir vung vung hlawm a, Inkhawm hman lo thenkhat, Piantharna dik tak nei ho pawh an in chhung atang chuan van lam pan chuan an kang nul nul hlawm a. Thlan atang te chuan mithi thenkhat Piangtharna tha nei ho pawh an rawn tho va, van lam pan chuan an kang chho ve zel a. Fel ni a inngai biakin-a inkhawm tam avang leh kohhrana rawngbawl tha ve em em a in ngai mi tam tak chu an kang ve ta miahlo mai le!? Tap ri rawih rawih te, kang ve silo kang ve tura in ngai zuang zuk zuk lah hmuh tur an tam; a sawt tawh si lo.

Tuikhur a nu berh te insu pawh chu a fate pahnih nen chuan van lam pan chuan an kang nal nal a, he nu rethei tak hi piangthar tha tak mahse an pa rui reng mai a nih avang leh buai lutuk vanga inkhawm hmanve ta lo a ni a, tichuan "MITHIANGHLIM LAWR" ho chu van lamah chuan an kang zela, van kak ruih eng phut chhungah chuan an lut zela. An lut zo ta tihah chuan, vantirhkoh ho pawh chu chumi eng tak chhungah chuan antawlh lut zel a, van kak chu a rawn zim leh tual tual a, a in khar ta hmak a. Chumi hnu chuan khawvel chu ni pawh a lang tawh lo, a eng ve ringawt ang hian a awm ta a. An tap a, an lungngai a, awmzia a neilo mai ni lovin a sawt tawh lo, beisei tur a awm lo a ni ber e.

He Article chhiar tute han inngaihtuah chiang ula, khawilamah zawk hian nge i awm dawn le!!!। Tha ni a inngai tha silo te, pawnlam lan dan tha a, chhunglam thianghlim si lo te Khawvel-ah hian kan awm a ni tih a chiang a ni। I kawng zawh tur chu ngun takin in chhut rawh le